Yanga kuivaa Singida United bila Lwandamina

Mabingwa watetezi ligi kuu ya Vodacom Yanga leo wanashuka kwenye uwanja wa Taifa kuikabili Singida United bila ya uwepo wa kocha wake Mkuu George Lwandamina.

Jana klabu ya ZESCO United ilimtangaza Lwandamina kuwa kocha Mkuu wa timu hiyo akirithi mikoba ya Tenant Chembo aliyejiuzulu.

Lwandamina amesaini mkataba wa miaka mitatu kuitumikia ZESCO.

Mkataba wa Lwandamina na Yanga unamalizika mwishoni mwa mwezi Mei hata hivyo kocha huyo aliondoka kurejea kwao Zambia baada ya mchezo dhidi ya Wolaitta Dicha.

Mmoja wa wajumbe wa kamati ya utendaji ya Yanga Salum Mkemi amethibitisha kuondoka kwa Lwandamina baada ya mchezo dhidi ya Dicha lakini juu ya kujiunga ZESCO amesema taarifa hizo wameziona kwenye mitandao ya kijamii.

Kocha Msaidizi Shedrack Nsajigwa anatarajiwa kukiongoza kikosi cha Yanga kuikabili Singida United inayonolewa na kocha wa zamani wa timu hiyo, Hans van Pluijm.

Yanga inahitaji kuibuka na ushindi ili kuweka hai matumaini ya kutetea ubingwa.

Kwa sasa iko nyuma ya Simba kwa tofauti ya alama sita, matokeo yoyote tofauti na ushindi huenda yakairahisishia Simba kutwaa ubingwa mapema.

Ukiacha mchezo huo, ligi kuu ya Vodacom inaingia kwenye mzunguuko wa 24 kwa michezo kadhaa kupigwa leo.

Michezo mingine inayopigwa leo;

Stand United vs Majimaji
Mbao FC vs Njombe Mji
Prisons vs Kagera Sugar
Mwadui vs Lipuli FC