Ligi Kuu ya NBC inaelekea mwishoni ambapo May 28 jamvi la msimu huu litakunjwa rasmi na kuanza maandalizi ya msimu ujao
Yanga iko katika nafasi nzuri ya kutetea ubingwa wake kwa msimu wa tatu mfululizo ambapo wananchi wanahitaji alama nane tu ili kuhifadhi taji la Ligi Kuu kwa mara ya 30
Rais wa Yanga Injinia Hersi Said aliweka wazi malengo ya Yanga msimu ujao ni kufanya vyema zaidi hasa katika michuano ya Kimataifa
Na hii ndio sababu Yanga itafanya maboresho kwenye nafasi zenye mapungufu katika dirisha la usajili litakalofunguliwa mwezi ujao
Mpaka sasa kuna orodha ya nyota ambao huenda msimu ujao watavaa uzi wa Yanga. Hersi wakati huu yuko busy kukamilisha michakato mapema
Katika eneo la ushambuliaji linatarajiwa kuongezewa nguvu ambapo inaelezwa kuna usajili unasubiri kutangazwa tu
Prince Dube 'Mwana wa Mfalme' aliitumikia Azam Fc katika msimu huu kabla ya kuamua kuachana na timu hiyo kwa kile alichoeleza hana furaha
Dube aliwashinda Azam Fc katika madai yao ya kuwa na mkataba nae hadi mwaka 2026. Mkataba huo mpya waliodai Azam Fc haukuwa umeingizwa katika mfumo wa usajili wa TFF na FIFA ambapo taarifa za mkataba wa Dube zilionyesha mkataba wake na Azam Fc unamalizika mwishoni mwa msimu huu
Hivyo Dube akatakiwa kulipa fedha ambazo Azam Fc walithibitisha kumpatia kwa ajili ya mkataba mpya ambapo baada ya hatua hiyo kukamilika atakuwa huru
Safu ya ulinzi upande wa kushoto pia inatarajiwa kuwa na maboresho ambapo jina la mlinzi wa Fc Lupopo Chadrak Boka limetajwa
Mkataba wa Joyce Lomalisa unaelekea ukingoni na taarifa za ndani zimedokeza kuwa Yanga haitamuongeza mkataba mpya kutokana na muda mwingi kuwa nje akiwa majeruhi
Boka (24) yuko katika nyakati bora zaidi katika klabu ya FC Lupopo ambapo pamoja na Yanga pia anatajwa kuwaniwa na klabu za Tp Mazembe , Petro de Luanda na Wydad
Injinia Hersi alikuwa DR Congo wiki iliyopita, tetesi ni kuwa tayari amekamilisha usajili wa mlinzi huyo huku pia kukiwa na taarifa kuwa kuna 'surprise' kutoka pale Lubumbashi kunako klabu ya TP Mazembe
Hersi ni shabiki mkubwa wa yule winga anayevaa jezi namba 7 (Felippe Kinzumbi) na jana Yanga iliweka hadharani picha zikimuonyesha Hersi akiwa na Mmiliki wa Mazembe Mois Katumbi!. Hersi hajawahi kushindwa akiwa na jambo lake...!
Kwa upande wa wachezaji wa ndani, kiungo mkabaji wa Singida FG Yusuph Kagoma nae inaelezwa ni suala la muda, Yanga ikiwa tayari imemsajili ili kuongeza nguvu katika eneo la kiungo kukiwa na taarifa kuwa Zawadi Mauya huenda akaondoka mwishoni mwa msimu
Lakini pia kuna ile ahadi ya bango pale kwa jirani! Anatajwa Kibu Denis. Huyu ndiye 'rastaman' ambaye amewafanya viongozi wa upande ule washikwe na butwaa baada ya kuwagomea kusaini mkataba mchana kweupeeee!
Ni wazi katika dirisha la usajili lijalo Yanga haitafanya usajili mkubwa kwani mpaka sasa Miguel Gamondi ameridhishwa na ubora wa kikosi chake kwa asilimia kubwa
