Meneja wa Habari na Mawasiliano klabu ya Yanga Ali Kamwe amesema wamesitisha shamrashamra za ubingwa wa ligi kuu ya NBC kwa muda ili wajikite kwenye maandalizi ya mchezo wa nusu fainali kombe la Shirikisho la CRDB dhidi ya Ihefu Fc utakaopigwa Jumapili, May 19 mkoani Arusha
Kamwe amewataka Wanachama na Mashabiki wa Yanga kuweka nguvu zao katika mechi hiyo ili kuhakikisha wanakata tiketi ya kutinga fainali
Kuhusu shamrashamra za ubingwa, Kamwe amesema watatangaza baada ya kumalizana na Ihefu Fc
"Kwa sasa tumesitisha shamrashamra za ubingwa wa 30 wa ligi kuu kwa muda, mbele yetu tunakabiliwa na mechi ngumu ya nusu fainali ya kombe la FA dhidi ya Ihefu Fc"
"Ihefu Fc ni miongoni mwa timu chache ambazo tumegawana nazo pointi msimu huu. Walitufunga mabao 2-1 katika mchezo wa kwanza wa ligi na sisi kuwafunga mabao 5-0 katika mchezo wa pili"
"Tunakutana nao tena katika nusu fainali ya FA, tunafahamu haitakuwa mechi nyepesi, tayari timu iko kambini kujiandaa na mchezo huu"
"Niwaombe wapenzi, wanachama na mashabiki wetu kuwa tunapaswa kuungana na kuipa sapoti timu yetu ili kuhakikisha tunapata ushindi"
"Najua wengi wana shauku ya kufahamu kuhusu parade la ubingwa wa ligi kuu, niwaambie tu, kwa sasa tumalizane kwanza na Ihefu Fc, baada ya hapo tutatangaza kila kitu," alisema Kamwe
Yanga imepania kutetea taji la FA kwa msimu wa tatu mfululizo kama walivyofanya katika ligi kuu
