Aliyewahi kuwa Mwenyekiti na Mfadhili wa Yanga, Yusuf Manji anatarajiwa kuzikwa leo nchini Marekani. Manji alifariki usiku wa kuamkia jana katika hospitalini Florida huko Marekani
Kwa mujibu wa taarifa ambayo mtoto wa marehemu Mehbub Manji ameitoa, familia wanashukuru kwa jinsi ambavyo Watanzania wameendelea kuombeleza kifo cha baba yao na jinsi ambavyo wameendelea kumuombea huko alipo.
"Tunawaomba muendelee kumuombea baba yetu awe na safari njema huko aendapo. Alikuwa anaipenda Tanzania na Watanzania wanampenda sana, lakini tunaomba kuwaambia kuwa Manji atazikwa leo saa tisa alasiri Orlando, Florida Marekani, karibu na sehemu aliyozikwa baba yake. Baba tulikupenda lakini Allah amekupenda zaidi. Yusuf Manji: Ni baba, rafiki, kiongozi," ilimalizia taarifa hiyo
Manji ambaye aliingia madarakani mwaka 2012, alikuwa Mwenyekiti wa Yanga kwa kipindi cha miaka mitano tangu mwaka 2012 hadi 2017 na kufanikiwa kutwaa makombe manne ya Ligi Kuu Bara, Kombe moja la FA, Ngao ya Jamii na Kombe la Kagame
Manji anatajwa kuwa mwekezaji wa kwanza kwenye soka la Tanzania kuongeza thamani za wachezaji ambapo katika kipindi cha uongozi wake, mishahara na 'signing fees' za wachezaji zilianza kupanda
Wachezaji kama Kelvin Yondani, Emmenuel Okwi, Juma Kaseja aliowasajili kutoka Simba, Donald Ngoma, Thabani Kamusoko, Obrey Chirwa na hata Mrisho Ngasa wanaweza kuthibitisha ni kwa kiasi gani Manji alipandisha thamani zao
Manji alikuwa na upendo mkubwa kwa klabu ya Yanga, kauli yake ya mwisho aliposhiriki Mkutano Mkuu wa Wanachama wa Yanga 2022/23 alisema moyo wake ameuacha Yanga
Aliipenda na kuisaidia Yanga kila alipohitajika kufanya hivyo, mara kadhaa aliwalipia tiketi mashabiki wote wa Yanga na kushuhudia baadhi ya mechi bure
Kwa hakika Manji ataendelea kuishi katika mioyo ya Wanayanga
