Klabu ya Yanga imeandaa utaratibu maalum wa utambulisho wa kiungo mshambuliaji Clatous Chama aliyesajiliwa na mabingwa hao wa nchi kutoka klabu ya Simba
Imezoeleka Yanga hutambulisha wachezaji wake wapya kwa utaratibi tofauti na ule uliotumika hapo jana
Jambo hilo liliibua maswali miongoni mwa wadau na kupelekea baadhi ya watu kusambaza uzushi juu ya usajili huo
Akizungumza katika Mkutano na Wanahabari mapema leo, Kamwe alisema utambulisho waliofanya jana ni mwanzo tu, kwani wameandaa tukio maalum kumkaribisha Chama Jangwani
"Hatukufanya vile kwa kukurupuka tu, lazima ifahamike hii ni biashara ya mpira wa miguu. Unajua baada ya utambulisho ule ni kampuni ngapi zimeulizia kuhusu utambulisho rasmi wa mchezaji akiwa na jezi ya Yanga? Unajua ni kwa kiasi gani tumetengeza shauku ya watu kutaka kumuona Chama katika jezi ya Yanga?," alihoji Kamwe
"Suala la Usajili wa Chama ni sehemu ya biashara yetu. Kila mtu anakiri kuwa usajili wa Chama ni usajili mkubwa. Mtiririko wa matukio ya usajili huu wa Chama kwetu ni fursa. Najua wengi wanatamani kujua Chama ataonekanaje na jezi ya Yanga. Hapo ndipo tunalenga kuuza usajili huu," alisema
Kamwe amesema Yanga ndio klabu ya kwanza kuja na utaratibu wa kutambulisha wachezaji wapya kupitia video fupi fupi, Kila wakati watakuja na ubunifu tofauti lengo likiwa kuinufaisha klabu kutokana na usajili huo
Aidha Kamwe amedokeza leo jioni watatambulisha usajili wa mchezaji mwingine ambao nao wataufanya kwa utaratibu tofauti
Kamwe amezindua huduma ya Yanga Habari ambapo wanachama na mashabiki wataweza kupata habari muhimu za timu yao kupitia ujumbe mfupi (SMS)
Gharama za kupata Yanga Habari kwa wiki ni Tsh 500 na kwa mwezi Tsh 2000. Huduma hiyo inapatikana kwa kujiunga kupitia *149*40#
