Katika kikosi cha kocha Miguel Gamondi msimu huu ni wazi haitakuwa rahisi kwa wachezaji kujihakikishia nafasi ya kudumu katika kikosi cha kwanza
Ushindani umeanza mapema dalili zinaonekana kwani kila mchezaji anayepata nafasi ya kucheza katika mechi hizi za pre-season anajituma kwelikweli
Gamondi amesema ushindani huo ndio aliohitaji kwani utamfanya kuwa na timu yenye wachezaji wanaojituma sana uwanjani
"Ushindani wa namba umeongeza kitu kikubwa kwa wachezaji na kuwafanya wawe na ari ya kupambana, kwani hakuna anaejiamini atapata nafasi kutokana na ubora wa kila mmoja wapo"
"Ninafurahia jambo hilo kwani limewafanya wachezaji kujituma na kutafuta nafasi na hizo ni sifa za mchezaji anayecheza kwa malengo"
"Kikosi tulichosajili ni kwa malengo yetu ya msimu ujao kwa ajili ya mashindano ya kimataifa na ya ndani, hatukuhitaji kuruhusu wachezaji wetu bora waondoke, nafahamu zimekuja ofa nyingi lakini napongeza uongozi, tumeweza kulinda mipango yetu ya msimu ujao," alisema
Jana Yanga ilicheza mechi ya pili ya Mpumalanga Premier's International Cup dhidi ya TS Galaxy ambayo ilimalizika kwa Yanga kuibuka na ushindi wa bao 1-0
Katika kipindi cha kwanza Gamondi alitumia nyota wote wazawa na wakamaliza kipindi hicho pasipo kuruhusu bao
Alipofanya mabadiliko katika kipindi cha pili, Yanga iliongeza kasi zaidi na kufunga bao pekee kupitia kwa Prince Dube aliyemalizia pasi ya Stephane Aziz Ki
