Kuelekea kwenye mchezo wa hatua ya awali ya Ligi ya Mabingwa Afrika, Kocha Mkuu wa Yanga Miguel Gamondi amesema hatowadharau wapinzani wao Vital'o ya Burundi licha ya michezo yote kufanyika hapa nchini
Gamondi, alisema anafahamu umuhimu na faida ya kucheza kwenye uwanja wa nyumbani, lakini watamuheshimu mpinzani wao kwa kuwa soka ni mchezo wenye matokeo ya kushangaza wakati mwingine
Vital'o walichagua uwanja wa Azam Complex kuwa uwanja wao wa nyumbani baada ya CAF kuwagomea kucheza Burundi baada ya kukosa uwanja unaokidhi vigezo
Gamondi amesema anakiandaa kikosi chake kikamilifu ili kuhakikisha wanashinda mechi hiyo na kusonga mbele hatua inayofuata
"Tunajiandaa kikamilifu, mchezo hautakuwa mwepesi kama inavyodhaniwa, najua wapinzani wetu licha ya kucheza hapa Tanzania michezo yote, wamejiandaa vizuri, tutakabiliana nao kwa tahadhari," alisema Gamondi
Yanga wanatarajia kuumana na Vital'o, Agosti 17 kwenye mchezo wa kwanza ambao Warundi hao watakuwa wenyeji kwenye Uwanja wa Azam Complex, Chamazi kabla ya kurudiana wiki moja baadaye Uwanja wa Benjamin Mkapa ambao Yanga watakuwa wenyeji
