Wiki iliyopita, Rais wa Yanga Injinia Hersi Said alidokeza dhamira ya mabingwa hao wa Tanzania Bara kwa misimu mitatu mfululizo kupeleka visiwani Zanzibar mechi ya marudiano ya raundi ya kwanza ya ligi ya mabingwa dhidi ya CBE SA ya Ethiopia. Yanga itaanza ugenini na kumalizia nyumbani
Taarifa kutoka ndani ya Shirikisho la soka Zanzbar (ZFF), imethibitisha kuwa maandalizi yameanza baada ya kupata uthibitisho kutoka Shirikisho la soka barani Afrika (CAF) ambalo limewataarifu juu ya mchezo huo kupigwa Zanzibar
Katibu Mkuu wa ZFF, Hussein Ahmada amesema tayari ZFF na wadau wake wameshaanza maandalizi ya kuupokea mchezo huo ambao utatoa hatma ya Yanga katika kusaka rekodi ya kucheza makundi ya Ligi ya Mabingwa kwa mara ya pili mfululizo.
"Ni kweli CAF wameshatujulisha kwamba huu mchezo utatumika kwenye uwanja wetu wa New Amaan kama ambavyo timu mwenyeji wa mchezo huo Yanga walivyoomba"
"Sisi kama ZFF kwanza tunawashukuru Yanga kwa uamuzi huo wa kizalendo, Zanzibar ni sehemu ambayo ina mashabiki wengi lakini pia hata wale ambao watatoka bara hapa ni rahisi kufika"
"Hivyo sisi kama ZFF tumeshaanza maandalizi kwa haraka, kujiandaa na kupokea wageni kwa timu zote lakini pia mashabiki wao tunaamini Uwanja wa Amaan utakuwa ni baraka kwa Yanga kushinda kwa kishindo na hata kufuzu kuingia makundi na pengine kwenda mbali zaidi," Ahmada alinukuliwa na gazeti la Mwanaspoti
Hii itakuwa mara ya pili Yanga kucheza mech kubwa ya mashindano katika uwanja wa New Amaan Complex baada ya kufanyiwa maboresho
Yanga ilikamilisha msimu uliopita kwa kutwaa kombe la Shirikisho la CRDB katika uwanja huo kwa kuifunga Azam Fc mikwaju ya penati 6-5 baada ya matokeo ya suluhu ya bila kufungana
