Kocha Mkuu wa Yanga, Miguel Gamondi, amesema kazi aliyokuwa nayo kuelekea mechi ijayo ya Ligi ya Mabingwa Afrika dhidi ya CBE ya Ethiopia, ni kuhakikisha wanafanyia kazi eneo la umaliziaji
Akizungumza jijini Dar es Salaam, kocha huyo alisema kuelekea mchezo ujao atalifanyia kazi tatizo hilo ili lisijirudie tena kwenye Uwanja wa New Amaan Complex, Zanzibar
Gamondi alitoa sababu ambazo anaamini huenda zilisababisha hilo, lakini hataki liendelee kwa vijana wake
"Nahitaji kukaa nao na kuwaweka kwenye mtazamo na umakini ule ambao tumeuzoea, hii ya kukosa mabao nadhani imetokana na kutokuwa fiti pamoja na umakini"
"Sikuwa na wachezaji 14 ambao walikuwa kwenye vikosi vya timu za taifa, kitu ambacho kimesababisha wengi wasiwe kwenye viwango vya kawaida na umakini na hii huwa linatokea sana wachezaji wanapokwenda kwenye timu za taifa," alisema
Gamondi alibainisha kuwa katika mchezo uliofanyika kwenye Uwanja wa Abebe Bikila, Ethiopia, walikosa jumla ya mabao saba ambayo kama wangeshinda wangekuwa wameimaliza mechi ugenini
"Sijafurahishwa na kiwango kwa sababu tumepoteza nafasi nyingi sana, tulikuwa tuimalize mechi kule kule kama tungepata nafasi zile kwa hiyo, ni lazima nilifanyie kazi kabla ya kukutana kwenye mechi ya marudiano"
Akizungumzia mchezo wa marudiano, alisema hautokuwa rahisi kama ambavyo wengi wanavyodhani, lakini akawataka mashabiki wa Yanga kufurika uwanjani kwani amewaandalia mambo mazuri
Katika mchezo wa Jumamosi Yanga ilishinda bao 1-0, lililofungwa na straika raia wa Zimbabwe, Prince Dube
Yanga inahitaji ushindi au sare yoyote ili kuweza kutinga hatua ya makundi kwa mara ya pili mfululizo, ambapo msimu uliopita ilifanya hivyo na kuishia hatua ya robo fainali
