Pamoja na ubora, katika misimu ya karibuni Yanga imekosolewa zaidi kwa kushindwa kutumia vyema mipira ya adhabu
Ukiacha mapigo ya moja kwa moja ambayo mara kadha Stephane Aziz Ki amefunga na hata Clatous Chama, ni nadra sana Yanga kufunga kupitia mipira ya kona na mapigo mengine ya adhabu ambayo sio moja kwa moja
Kocha Mkuu wa Yanga Miguel Gamondi amefichua kuwa kazi kubwa imefanyika katika kiwanja cha mazoezi na hivyo msimu huu Yanga imejipanga kufunga mabao mengi kupitia mipira hiyo
Kudhihirisha hilo tayari beki Ibrahim Bacca amefunga mabao mawili akimalizia mapigo ya mipira ya kutenga
Gamondi amesema amegundua katika Ligi Kuu Tanzania Bara, mipira ya faulo inapatikana mingi, lakini imekuwa haitumiwi vizuri, hivyo ametengeneza mafunzo maalum kwa nyota wake ili waweze kupata mabao kwa njia hiyo
"Kwa sasa tumejifunza jinsi ya kupata mabao kwa njia ya faulo, kila kitu tumekifanyia mazoezi, katika ligi ya Tanzania wachezaji wanafanya faulo nyingi sana, kama zinatumiwa vizuri, tunaweza kupata mabao mengi na ndivyo ninavyofanya sasa," alisema Gamondi
