Kocha Mkuu wa Yanga Miguel Gamondi anaendelea kukiandaa kikosi chake kuelekea mchezo wa ligi kuu dhidi ya Simba utakaopigwa Jumamosi, Oktoba 19 katika uwanja wa Benjamin Mkapa
Licha ya kikosi chake kupewa nafasi kubwa kuelekea mchezo huo, Gamondi amesema mchezo hautakuwa mwepesi na watahitaji kupambana ili kuweza kupata matokeo mazuri
Gamondi amesema wanakwenda kucheza dhidi ya timu kubwa yenye wachezaji wengi wenye vipaji hivyo ni lazima kujipanga
"Sisi hatusikilizi nini kinasemwa na wachambuzi au mashabiki kwa sababu tunafahamu tunakwenda kucheza mechi ngumu"
"Simba ni timu kubwa yenye wachezaji wenye vipaji vikubwa na historia ya mafanikio. Tunawaheshimu sana kama wapinzani, lakini tunajipanga vizuri kuwakabili"
"Tunafahamu wanavyocheza na nguvu yao, tutatumia maandalizi yetu kuleta ushindani na kuhakikisha tunapata matokeo mazuri kwa kutumia vyema nafasi tutakazopata," alisema Gamondi
Akiwa katika msimu wake wa pili na Yanga, Gamondi amejipambanua kwa rekodi yake nzuri dhidi ya Simba
Amekutana na Simba mara nne, ameshinda mechi tatu na sare (dakika 90) katika mchezo wa Ngao ya Jamii msimu uliopita ulioamuliwa kwa changamoto ya mikwaju ya penati
Kocha huyo raia wa Argentina ameiongoza Yanga kushinda mechi tatu mfululizo dhidi ya Simba
