Kocha Mkuu wa Yanga Sead Ramovic amewapongeza vijana wake kwa ushindi wa mabao 2-0 dhidi ya Namungo Fc katika mchezo wa ligi kuu uliopigwa uwanja wa Majaliwa jana
Akizungumza baada ya mchezo huo, Ramovic alisema ni alama tatu muhimu kwao hasa baada ya kupoteza mechi zilizopita
Ramovic aliwashukuru mashabiki waliojitokeza kwa wingi kuiunga mkono Yanga katika mchezo huo ambao walihitaji sana sapoti yao
Licha ya ushindi huo, Ramovic alisema bado kuna kazi ya kufanya katika uwanja wa mazoezi ili kuimarisha zaidi
"Bado tuna safari ndefu msimu huu lakini nadhani matokeo haya ni muhimu kwetu kwa wakati huu. Nawapongeza wapinzani wetu, haikuwa rahisi kwani walikuwa wazuri katika mbinu zao kwenye kuzuia"
"Ni alama tatu kwetu lakini bado tunahitaji kujiimarisha zaidi. Bado kuna maeneo mengi tunahitaji kuboresha likiwemo eneo la 'fitness'. Najua sio rahisi lakini tutaendelea kuimarika taratibu"
"Sasa tunakwenda kujiandaa kwa ajili ya mchezo unaofuata (CAF CL dhidi ya MC Alger), ni mechi muhimu sana kwetu lakini naamini baada ya kupata ushindi leo, tutakwenda katika mchezo huu tukiwa na fikra tofauti," alisema Ramovic
Jana Yanga ilionyesha utofauti mkubwa, timu ilishambulia kwa kasi na walihakikisha wapinzani wao hawapati nafasi ya kumiliki mpira
Pale walipopoteza mpira, 'wali-press' haraka kuurejesha katika himaya yao. Hii ndio aina ya soka ambalo Ramovic anataka kuwaona vijana wake wakicheza
