Meneja wa Habari na Mawasiliano klabu ya Yanga Ali Kamwe amesema wachezaji watahitaji kupambana na kuvuja jasho jingi katika mchezo wa ligi ya mabingwa dhidi ya TP Mazembe ili kufufua matumaini ya kusonga mbele hatua inayofuata katika michuano hiyo
Yanga ilitua Lubumbashi jana tayari kwa mchezo dhidi ya TP Mazembe utakaopigwa Jumamosi, Disemba 14 saa 10 jioni katika dimba la Mazembe
Kamwe amesema licha ya kuwa na rekodi nzuri ya ushindi katika mechi mbili za mwisho walizocheza dhidi ya TP Mazembe, ni juhudi na kujituma kwa wachezaji pekee ndiko kutawapa matokeo mazuri katika mchezo huo na sio rekodi
"Hatufikirii rekodi ya mechi zilizopita, hapa tulipofika hakuna rekodi yoyote inayoweza kutusaidia, kitakachotusaidia ni kuvuja kwa jasho letu kwenye mchezo huo, hakuna muda kutafuta vijisababu vya pembeni, ni muda wa kwenda kutokwa machozi, jasho na damu ili tupate matokeo mazuri"
"Ni mechi ngumu, lakini hakuna namna ni lazima tuikabili, tuna imani tunaweza kupata matokeo mazuri dhidi yao, malengo yapo pale pale, kufuzu kwenye hili kundi, haijaisha na wala hatujachoka," alisema Kamwe
Misimu miwili iliyopita timu hizo zilikutana mara mbili kwenye hatua ya makundi, Kombe la Shirikisho Afrika na Yanga kushinda michezo yote miwili, ikiichapa TP Mazembe mabao 3-1 Februari 19, mwaka jana Uwanja wa Benjamin Mkapa, Dar es Salaam na marudiano kushinda 1-0 kwenye uwanja wa ugenini
Mchezo huo wa kesho utazikutanisha timu ambazo hazijapata ushindi wowote kwenye michezo iliyopita katika kundi lao. Hata hivyo, TP Mazembe ina pointi moja iliyoipata kwa kutoa suluhu dhidi ya MC Alger ya Algeria, nyumbani, huku Yanga ikipoteza michezo yote miwili ya mwanzo kwa mabao 2-0 dhidi ya Al Hilal Omdurman ya Sudan na 2-0 dhidi ya MC Alger
