Misimu michache nyuma, mlinzi wa kulia wa Yanga Kibwana Shomari aliwahi kuja na msemo 'Kazini kwangu kuna kazi' wakati huo akimaanisha wajibu wa kutekeleza majukumu yake kama mchezaji
Kibwana alitumia msemo huo kabla ya usajili wa Yao Kouassi lakini baadae msemo huo ukatumika dhidi yake baada ya kupoteza nafasi yake kwa Yao
Lakini kiwango anachoonyesha Kibwana tangu ujio wa kocha Sead Ramovic ni kama amebadili upepo na pengine sasa ni sahihi kusema 'kazini kwa Yao kuna kazi'
Msimu huu umekuwa mgumu kwa Yao ambaye anasumbuliwa na majeraha ya mara kwa mara lakini kwa kile anachokifanya Kibwana, hakuna anayemuulizia beki huyo raia wa Ivory Coast
Baada ya kukosekana kwa muda mrefu katika mechi za Kimataifa, Jumamosi Kibwana akarejeshwa na kuwavaa TP Mazembe katika mchezo ambao Yanga iliibuka na ushindi wa mabao 3-1
Ni wazi hata Yao atakaporejea baada ya kupona, utawala wake katika safu ya ulinzi upande wa kulia, utakuwa katika majaribu makubwa
Aidha, uwezo wa kutumika kama mlinzi wa kushoto unampa faida zaidi Kibwana ambaye pia anaweza kuwapa changamoto Chadrack Boka, Kibabage na Israel Mwenda aliyesajili katika dirisha hili dogo
