Kocha Mkuu wa Yanga Sead Ramovic amesema mwenendo wa kikosi chake unampa matumaini kuwa watafikia malengo ya kuwa na timu bora na yenye ushindani zaidi
Tangu akabidhiwe mikoba ya kuinoa Yanga, Ramovic amewaongoza Wananchi kushinda mechi zote sita za ligi kuu wakifunga mabao 22 na kuruhusu mabao mawili tu
Akizungumza baada ya ushindi wa mabao 4-0 dhidi ya Kagera Sugar juzi, Ramovic alisema sasa wanatengeneza nafasi nyingi na kuzitumia ingawa sio kwa ufanisi mkubwa
Lakini pia timu imeendelea kuwa imara katika kujilinda ambapo amesema wachezaji wote wanatimiza vyema majukumu yao pale wanapokuwa hawana mpira
"Nafurahi kuona wachezaji wanaimarika kadiri ya siku zinavyosogea, kasi, nguvu na juhudi uwanjani inazidi kuwa kubwa kwa kiwango kinachovutia, tunafunga mabao lakini najua hatuwezi kutumia kila nafasi ila tunaweza kufunga mabao zaidi"
"Ukitazama kama tuna safu ya ulinzi nzuri ni sawa mabeki wanafanya vizuri lakini hapa ningependa kuiangalia timu nzima namna tunavyopoteza mpira wote tunapambana kuuondoa kwenye umiliki wa wapinzani na hili limekuwa likifanyika vizuri"
"Nawapongeza wachezaji wamecheza vizuri pamoja na kukutana na timu ambayo ilikuwa na mpango wa kujilinda zaidi na kutumia mipira ya kushtukiza wameweza kuwapita na kufunga mabao zaidi ya matatu," alisema Ramovic
Katika mechi zake 6, Ramovic ameivunja rekodi ya mabao ya mtangulizi wake Miguel Gamondi ambaye katika mechi 10 alizokiongoza kikosi cha Yanga msimu huu, timu ilifunga mabao 12 tu
