Kocha Mkuu wa Yanga Miloud Hamdi amesema anatarajia mechi dhidi ya Mashujaa Fc itakuwa na upinzani mkali na warahitaji kuwa katika ubora wao kwa dakika zote 90 za mchezo ili kuondoka na alama tatu
Akizungumza katika Mkutano na Wanahabari kuelekea mchezo huo, Hamdi amesema Mashujaa Fc ni moja ya timu ngumu katika ligi kuu msimu huu na pengine walistahili kuwa katika nafasi za juu zaidi kuliko hapo walipo
Hata hivyo amesema Yanga ni timu kubwa na hiyo ni sababu wanahitaji kuwa bora katika kila mechi kwani kila timu inatamani kupata ushindi dhidi ya Yanga
"Tunaiheshimu klabu hii, wanaweza kucheza vizuri sana wana wachezaji wengi wazuri na nafikiri wanaweza kuwa juu zaidi kwenye ligi"
"Tunajua sisi ni Yanga na kila timu inataka kufanya kila kitu kushinda dhidi yetu. Wachezaji wetu wanajua hilo, na tunapaswa kufanya kila kitu kutumia jitihada nyingi kushinda mchezo huu," alisema Hamdi
Aidha Hamdi amesema wamepata wakati mzuri wa kujiandaa na mchezo huo akiwaongezea wachezaji wake mambo muhimu ya kiufundi hivyo matumaini ni kucheza vyema na kuibuka na ushindi
"Ni jambo jema kuwa na siku tano kabla ya mchezo huu, ni nafasi nzuri kwangu kuelewa wachezaji wangu vizuri zaidi"
"Nimepata muda wa kufanya marekebisho ya kiufundi mazoezini, kuweka mtazamo wangu kidogo kwa sababu si rahisi kubadilisha kila kitu mara moja"
"Wachezaji tayari wana tabia zao za uchezaji, hivyo si rahisi kubadilisha kila kitu. Nimefanya marekebisho ya kimkakati kulingana na kile ninachokiona na ninachotaka kutoka kwa wachezaji na tutaendelea kufanya hivyo kwa ajili ya kujiboresha zaidi"
"Tuna malengo mawili moja ni kupata alama tatu muhimu na jingine ni kuwashukuru mashabiki wetu waliofika kwa wingi kutupokea wametupa furaha kubwa, tumefurahi kuwaona na wamefurahia pia. Sasa ni kazi yetu kuwapa furaha kwa kushinda mchezo huu kwa ajili yao," alisema Miloud
