Umoja wa Matawi 12 ya wanachama wa Klabu ya Yanga mkoani Geita wameunga mkono uamuzi wa viongozi wao kutocheza mchezo mwingine wa dabi ya Kariakoo dhidi ya Simba kwa mzunguko wa pili wa Ligi Kuu Tanzania Bara
Maazimio ya wanachama hao yalitolewa juzi mbele ya waandishi wa habari baada ya kuitisha mkutano wa dharura mjini Geita na kusisitiza kwa kauli moja kuwa wanataka kuona haki inatendeka
Mratibu wa Matawi ya Yanga Mkoa wa Geita, Rajab Mohamed akisoma maazimio ya wanachama wa Yanga Geita amesema uamuzi uliotolewa na Rais na Makamu wa Rais wa Yanga ni sahihi
"Wanachama na mashabiki wa Yanga ndani ya mkoa wa Geita, tunaungana na viongozi wetu wa makao makuu, hatuhitaji busara kutatua mgogoro huu unaoendelea"
"Tunaamini bodi ya ligi inaongozwa na sheria pamoja na kanuni zake, basi viongozi wa bodi ya ligi kutatua huu mzozo na siyo watuambie masuala ya busara na hekima"
"Kama Yanga amevunja sheria ama Simba amevunja sheria, basi TFF na bodi ya ligi wakae chini wapite hizo sheria," alisema Rajabu
Ameongeza, pia wanachama wa Yanga mkoani Geita hawana imani tena na uongozi wa bodi ya ligi na wanamtaka Rais wa Shirikisho la Soka Tanzania (TFF) kuacha kutoa kauli za kebehi na uchochezi
Wanachama wa Yanga kutoka mikoa mbalimbali wanaendelea kutoa matamko kuunga mkono msimamo wa viongozi wao kufuatia bodi ya ligi kuahirisha mchezo dhidi ya Simba uliopaswa kupigwa March 08 pasipo sababu za msingi
Mikoa ya Kigoma, Dar es salaam, Zanzibar na Pwani Wanachama wake wametoa matamko ya aina hiyo huu ukiwa msimamo wa mashabiki na wanachama wa Yanga nchi nzima
