Baada ya ushindi wa mabao 3-0 dhidi ya Tabora United, mabingwa watetezi ligi kuu ya NBC Yanga wanaendelea kujiweka katika nafasi nzuri ya kutetea ubingwa kwa msimu wa nne mfululizo
Yanga imesalia na mechi sita tu za kuhakikisha ubingwa unarejea Jangwani kwa mara nyingine. Hapa hatujahesabu mechi dhidi ya Simba ambayo Yanga imeweka wazi msimamo wake wa kutocheza huku ikiwa tayari imefungua kesi CAS dhidi ya waliokwamisha mchezo huo kuchezwa March 08
Jumatatu April 07 Wananchi watashuka dimba la KMC kuikabili Coastal Union na April 10 watakuwa Azam Complex kumenyana na Azam Fc
April 20 Yanga itakuwa Manyara kumenyana na Fountain Gate kabla ya kikosi kuelekea Zanzibar kushiriki ligi ya Muungano
Mechi tatu za kuhitimisha msimu zitapigwa May dhidi ya Namungo (May 13 - KMC Complex), Prisons (May 21 - Sokoine) na Dodoma Jiji (May 25 - KMC Complex)
Katika mechi sita zilizosalia, Yanga itatoka nje ya jiji la Dar es salaam mara mbili kuzikabili Fountain Gate na Tanzania Prisons na mechi nne zilizosalia zitapigwa jijini Dar es salaam
Mkakati wa Yanga ni kutwaa mataji yote matatu ya ndani Wananchi wakiwa tayari wameweka Ngao ya Jamii kabatini
Katika michuano ya kombe la Shirikisho la CRDB Yanga iko hatua ya robo fainali ikisubiri kucheza na Stand United
