Kocha Mkuu wa Yanga Miloud Hamdi anatamani kuona tuzo ya mfungaji bora ligi kuu ya NBC msimu huu inachukuliwa na mchezaji wa Yanga
Mpaka sasa mshambuliaji Clement Mzize ndiye anayeongoza mbio hizo akiwa amefunga mabao 13 lakini anachuana vikali na mshambuliaji mwenzake Prince dube aliyefunga mabao 12 kama ilivyo kwa Jean Ahoua wa Simba ambaye pia amefunga mabao 12
Katika orodha hiyo pia yupo mshambuliaji wa Singida Black Stars Jonathan Sowah aliyepachika mabao 11. Sowan amecheza mechi 10 tu akitua Singida Black Stars katika dirisha dogo la usajili
Pacome Zouzoua wa Yanga nae yumo akifunga mabao 9 huku mfungaji bora wa msimu uliopita Aziz Ki akifunga mabao 8
Hamd amesema Mzize na Dube wana nafasi ya kushinda tuzo hiyo na kwake angependa kuona tuzo hiyo inarejea tena Jangwani
"Nimewaambia washambuliaji wangu kama sio Dube, basi Mzize lazima wahakikishe wanachukua Tuzo ya Mfungaji Bora na ili waweze kulifanikisha hilo wanatakiwa kuendelea kutumia nafasi"
"Hata wachezaji wenzao sasa wanawarahisishia kazi uwanjani kwa kuwatengenezea nafasi za kufunga zaidi, lakini pia mfumo wa timu namna inavyocheza haitakuwa na kisingizio kwao kutokuwa juu kwa ufungaji," alisema Hamdi
Kwa misimu miwili mfululizo , Yanga imetoa mfungaji bora na mchezaji bora wa msimu, baada ya Fiston Mayele kubeba tuzo hizo, Aziz Ki akabeba msimu uliopita
Aidha Ki alimtabiria Dube kuwa anaweza kushinda tuzo hiyo. Yanga ina mechi tatu za kuhakikisha tuzo hiyo inabaki Jangwani
