Meneja wa Habari na Mawasiliano wa Yanga amewaalika mashabiki na wanachama wa Yanga katika msafara wa pamoja kuelekea mkoani Tanga kwenye mchezo wa nusu fainali kombe la CRDB dhidi ya JKT Tanzania utakaopigwa Jumapili, May 18 dimba la Mkwakwani
Kamwe amesema wanahitaji kuwa na angalau mabasi 50 katika msafara wa pamoja utakaoondoka siku ya Jumamosi, kuelekea Tanga safari ikitarajiwa kuanzia Makao Makuu ya Yanga, Jangwani
"Mpaka sasa tayari tuna mabasi 30 yatakayobeba mashabiki na wanachama wetu kuelekea Tanga kuiunga mkono timu yetu kwenye mchezo wa nusu fainali kombe la CRDB dhidi ya JKT Tanzania"
"Tunahitaji angalau mabasi 50, hivyo niwaombe mashabiki na wanachama ambao mngependa kujumuika nasi kwe safari tuwasiliane. Kama una Noah, gari binafsi kuchukua na mashabiki wenzao, tukutane Makao Makuu ya Yanga siku ya Jumamosi tayari kuanza safari saa 3 asubuhi"
"Tunakwenda kuweka rekodi ya msafara mkubwa wa mashabiki kuelekea mkoani Tanga kama tulivyofanya misimu miwili iliyopita wakati tunaelekea Rwanda," alitamba Kamwe
Yanga itamenyana na JKT Tanzania siku ya Jumapili katika mchezo ambao Wananchi watakuwa wakiisaka fainali ya tano ya kombe la CRDB
Yanga ndio mabingwa watetezi wa michuano hiyo na wamepania kutetea taji lao kwa msimu wa nne mfululizo
