Katika soka la Tanzania, ushindani baina ya Yanga na Simba hauishii uwanjani pekee – unapenya hadi mitaani, kwenye mitandao ya kijamii, na hata kwenye magari ya viongozi wa vilabu!
Na kama kuna mtu ambaye hujua namna ya kugeuza tukio la maumivu kuwa kejeli ya kisiasa ya kisoka, basi ni Ali Kamwe, Meneja wa Habari na Mawasiliano wa Yanga – maarufu kwa mabango yake ya "kuchoma" bila huruma.
Wacha tukurudishe nyuma kidogo. Msimu uliopita, mwamuzi Dahane Beida kutoka Mauritania alisimamia mchezo wa marudiano wa nusu fainali ya Ligi ya Mabingwa Afrika kati ya Yanga na Mamelodi Sundowns nchini Afrika Kusini.
Dakika ya 58, Stephane Aziz Ki alifunga bao zuri ambalo lingeipa Yanga nafasi ya kihistoria ya kutinga nusu fainali. Lakini Beida akaamua si bao – eti mpira haujavuka mstari mzima.
Ni uamuzi uliowaumiza Wananchi – si tu kwa kuwa ulizuia historia, bali pia kwa hisia ya wazi kuwa walinyimwa haki. Hata Rais wa CAF, Patrice Motsepe, alipofika Tanzania baadaye, alielezea mshangao wake kwa jinsi uamuzi huo ulivyotolewa, ingawa wengi waliona ni kauli ya kidiplomasia tu ya kuwapooza mashabiki.
Lakini – dunia duara. Karma ilikuja haraka mno.
Katika fainali ya Kombe la Shirikisho barani Afrika msimu huu, mwamuzi Beida tena alisimama katikati ya uwanja kusimamia pambano la Simba dhidi ya RS Berkane. Safari hii, ni mashabiki wa Simba waliolalamika kuwa walinyimwa goli la haki – tukio ambalo VAR ilionyesha mfungaji alikuwa ameotea. Beida akawa adui mpya wa Msimbazi, kama alivyokuwa kwa Wananchi mwaka juzi.
Na hapo ndipo utani wa jadi ukachukua nafasi. Ali Kamwe hakuwa kimya. Akiwa na mbinu zake za kisanaa za kejeli, aliamua kuandika ujumbe mzito kwa bango lililowekwa kwenye gari lake. Likaandikwa kwa herufi kubwa: "TUMEKUSAMEHE."
Ni ujumbe mfupi lakini wenye mzigo wa kejeli, hasira ya kale iliyosamehewa kwa mtindo wa dhihaka, na bila shaka, kuonesha kuwa Yanga hawajasahau kilichowatokea – ila sasa wanacheka upande wa pili wa meza.
Kwa mashabiki wa Yanga, hii ni "kisasi kisicho na ghasia". Kwa mashabiki wa Simba, ni kumbusho kuwa soka ni mduara na Beida si jina jipya tena la kuamini. Kwa wapenzi wa utani wa mpira, hili ni somo la namna rivalries zinavyopamba moto kwa ubunifu, si matusi.
