Baada ya kukata tiketi mapema ya kushiriki michuano ya ligi ya mabingwa barani Afrika msimu ujao, Meneja wa Habari na Mawasiliano wa Yanga Ali Kamwe amesema dhamira ya klabu ni kufanya vyema zaidi katika michuano hiyo msimu ujao
Ikiwa inaongoza ligi kuu ya NBC ikiwa na alama 73, Yanga imejihakikishia tiketi ya kushiriki michuano hiyo ambayo msimu huu waliondoshwa katika hatua ya makundi
Kamwe amesema yapo mambo ambayo wamejifunza katika ushiriki wao kwenye mashindano ya CAF katika misimu mitatu iliyopita na sasa wanaweka malengo ya kupiga hatua kubwa zaidi katika michuano hiyo
"Tumekata tiketi ya kushiriki ligi ya mabingwa msimu ujao tukiwa na mechi tano mkononi. Maana yake ni kuwa msimu huu tumekata tiketi mapema kuliko msimu ya nyuma"
"Lakini msimu ujao tutakwenda katika michuano hiyo tukiwa na kumbukumbu isiyopendeza ya msimu huu. Kwa namna klabu yetu ilivyoshindana katika kipindi cha misimu hii mitatu, unaweza kusema kuishia hatua ya makundi ni mafanikio pia lakini tayari klabu hii tumeshafanya mambo mengi makubwa ambayo sasa yanatusukuma kwenda zaidi ya malengo ya kawaida ambayo klabu ilikuwa nayo"
"Tumecheza fainali ya kombe la Shirikisho na tumecheza robo fainali ya ligi ya mabingwa maana yake tunatakiwa kuweka malengo ya kufanya vizuri zaidi ya hapo. Naamini kuelekea msimu ujao kila mshabiki na mwanachama wa klabu hii anatamani kuona klabu yake ikirudi katika zile nafasi za robo fainali, nusu fainali na ikiwezekana tucheze hata hatua ya fainali"
"Inawezekana klabu kama Pyramids imeweza kutufundisha msimu huu kuwa hauhitaji uzoefu wa kucheza mara nyingi katika michuano hiyo ili kuchukua ubingwa," alisema Kamwe
