Pamoja na kusisitiza kuwa Juni 15 Yanga haitakwenda uwanjani kucheza mechi namba 184 dhidi ya Simba, Wazee wa Yanga pamoja na viongozi wa Matawi wametangaza msimamo kuwa hakuna Mwanayanga yeyote ambaye anapaswa kwenda uwanjani Juni 15
Hii ni pamoja na viongozi wa klabu, yeyote ambaye atajaribu kuipeleka timu uwanjani basi afahamu atakuwa amejiondoa mwenyewe katika uongozi
Pia Wazee wamepiga marufuku Yanga kutajwa na chombo chochote cha habari kinachofanya matangazo ya mchezo huo
Kuhusu suala la Simba kupewa alama tatu na Yanga kupokwa alama 15, Wazee wamebainisha kuwa hawatarajii Yanga kupokwa alama na Bodi ya ligi kwa kuwa kama watafanya hivyo watathibitisha malalamiko ya Yanga kutokuwa na imani na Bodi hiyo ikizingatiwa hawakuchukua hatua kama hiyo March 08 pale Simba ilipoingia mitini
Mpaka sasa Bodi ya ligi haijajibu madai ya Yanga kwa kuzingatia barua ya klabu iliyoandikwa kwa Bodi hiyo March 09. Miongoni mwa madai ya Yanga ni kupewa alama tatu za mchezo huo kwa mujibu wa kanuni
Zaidi Wazee wamesema kama Bodi itachukua hatua ya kuipoka Yanga pointi, basi huo ndio utakuwa mwisho wa msimu huu
"Tarehe 15 ndio itatoa taswira ya mechi yetu ya juni 18, tukipokonywa hizo alama 15 ligi itakuwa imeishia hapo kwanza hakuna Kiongozi wa kutupokonya sisi alama 15 yaani wakijaribu tu ligi itakuwa imeisha," Shabani Omary Mgonja Mzee wa Yanga ambaye pia ni Mratibu wa Matawi
