Kampuni ya SportPesa imeipongeza klabu ya Yanga kwa kufanikiwa kutwaa mataji yote ya ndani msimu uliopita
SportPesa leo wametoa bonasi kwa Yanga kufuatia mafanikio waliyopata msimu uliomalizika kwa kushinda mataji matano
Mwenyekiti wa Bodi ya Wakurugenzi kampuni ya SportPesa, Abbas Tarimba amesema msimu uliomalizika ulikuwa wa mafanikio makubwa kwa Yanga na wanawapongeza kwa mafanikio hayo
Kutokana na makubaliano ya kimkataba, Tarimba amesema SportPesa imetoa bonasi ya Tsh Milioni 262 kwa Yanga
"Sisi kama SportPesa, wadhamini wakuu wa Yanga, katika kipindi cha miaka 8 iliyopita tumetimiza vyema majukumu ya kimkataba"
"Hivyo leo nichukue nafasi hii kutangaza kuipa Yanga Tsh Milioni 262 kama bonasi kutokana na mafanikio ya msimu uliopita"
"Sportpesa tunawapongeza sana Viongozi wa Yanga kwa namna ambavyo wameibadilisha hii Klabu. Yanga imepata mafanikio kwenye msimu ambao ulikuwa mgumu sana. Kubeba mataji matano sio jambo dogo kabisa katika historia ya nchi hii. Huu ndio mwaka bora kabisa katika historia ya Klabu hii"
"Tunawataka muendelee mafanikio haya msimu ujao na zaidi mhakikishe mnaleta kombe la Afrika (CAF CL) ambao mlilikosa msimu uliopita," alisema Tarimba
Akizungumza katika hafla hiyo, Rais wa Yanga Injinia Hersi Said amesema wanaishukuru kampuni ya SportPesa kwa kuidhamini Yanga kwa kipindi cha miaka 8
"Katika kipindi cha miaka nane ya udhamini wa SportPesa tumeshinda mataji mengi. Mafanikio haya ni taswira ya ushirikiano mzuri uliopo kati ya SportPesa na Yanga"
"Kwa kuzingatia makubaliano ya kimkataba, tunafahamu tuko katika majadiliano kwa ajili ya kuhuisha mkataba, nikuhakikishie Mwenyekiti, hatutakuwa na sababu ya kwenda kwa Mdhamini mwingine"
"Niwapongeze SportPesa hatujawahi kuwa na malalamiko ya malipo kutoka SportPesa, wametimiza wajibu wao wa kimkataba"
"Nikuhakikishie tutakwenda kuhakikisha mahusiano yanadumu na yanakwenda mbele zaidi, tutatimiza vyema jukumu letu la kuipa thamani SportPesa," alisema Hersi
