Kikosi cha Yanga, Jumatano August 13 kitaelekea Rwanda tayari kwa mchezo wa Kimataifa wa kirafiki dhidi ya Rayon Sports ambao utapigwa Ijumaa, August 15 katika uwanja wa Amahoro
Yanga imealikwa na Rayon Sports kwenye shamrashamra za Rayon Day, tamasha maalum la kukaribisha msimu mpya
Meneja wa Habari na Mawasiliano wa Yanga Ali Kamwe amethibitisha mkakati huo wa Wananchi kuelekea Rwanda siku ya Jumatano huku akiwataka wale wanaotaka kusafiri kuandaa utaratibu wa safari na kuwasilisha taarifa zao kwa uongozi
Baada ya mchezo dhidi ya Rayon Sports, huenda Yanga ikaelekea Misri kuhitimisha wiki mbili za maandalizi yake
Kamwe amesema watatoa taarifa juu ya mipango hiyo ya pre-season baada ya mchezo dhidi ya Rayon
"Mpaka sasa kikosi chetu kinaendelea na program za mazoezi KMC Complex, siku ya Jumatano tutasafiri kuelekea Rwanda kwa ajili ya mchezo dhidi ya Rayon Sports"
"Kuhusu wapi tutaelekea baada ya mchezo dhidi ya Rayon, tutatoa taarifa baada ya mchezo huo," alisema Kamwe
Inaelezwa Kocha Mkuu wa Yanga Romain Folz amependekeza kikosi chake kuelekea Misri kuhitimisha wiki mbili za maandalizi kabla ya kurejea nchini tayari kwa Wiki ya Mwananchi ambayo kilele chake kitakuwa wiki ya kwanza ya mwezi Septemba 2025
