Kikosi cha Yanga kimeondoka jijini Dar es salaam jioni ya leo Jumatano kuelekea Rwanda tayari kwa mchezo wa Kimataifa wa kirafiki dhidi ya Rayon Sports utakaopigwa Ijumaa, August 15
Msafara uliojumuisha wachezaji 24 umeelekea Rwanda huku mkufunzi wa timu hiyo, Romain Folz akiwa na matumaini makubwa kuelekea mchezo huo
Akizungumza muda mfupi kabla ya kuondoka JNIA, Folz alisema muda mchache aliopata kuiandaa timu hiyo ameutumia kuwaunganisha nyota wapya na wale wa zamani akiamini watakuwa tayari kucheza mechi ya ushindani siku ya Ijumaa
"Nimefurahishwa na juhudi za wachezaji wangu katika muda mfupi ambao tumefanya maandalizi kabla ya mchezo. Timu yetu ina wachezaji wapya hivyo kwanza tumefanya kazi ya kuwaunganisha na wenzao waliopo"
"Kwa ujumla naweza kusema tupo tayari kufanya kwa vitendo kwa kucheza mchezo wa kirafiki wa ushindani na naona nafasi ya kufanya vizuri," alisema Folz
Folz amesema anatambua mashabiki wana matarajio makubwa kwa timu yao hivyo yuko hapa kuhakikisha anatimiza matarajio hayo
Amesema mchezo dhidi ya Rayon una umuhimu kwani atautumia kama sehemu ya maandalizi katika wakati huu wa pre-season, anaamini watapata kipimo sahihi baada ya wiki mbili za mazoezi
"Mchezo wetu Ijumaa ni kwa ajili ya kutuweka tayari kwa kuwaandaa wachezaji kimwili na kimbinu baada ya mazoezi ya muda naamini utakuwa kipimo sahihi kwetu na kila mchezaji atapata nafasi ya kucheza."
