Meneja wa Habari na Mawasiliano wa Yanga Ali Kamwe amesema bado klabu haijafanya maamuzi juu ya ofa walizopokea kwa ajili ya mshambuliaji Clement Mzize
Tangu wiki iliyopita kumekuwa na taarifa kuwa klabu ya Esperance ya Tunisia iko katika hatua za kukamilisha mchakato wa uhamisho wa mshambuliaji huyo aliyeitumikia Yanga kwa misimu mitatu sasa akiwa bado ana mkataba wa miaka miwili
Kamwe amekiri kuna michakato inaendelea lakini ifahamike mpaka sasa bado Mzize ni mchezaji wa Yanga
"Clement Mzize bado ana mkataba na Yanga hivyo kwa sasa ni mali yetu mashabiki ninapenda kuwahakikishia kuwa mchezaji tupo naye hajaondoka"
"Kuhusu ofa kuna ofa zaidi ya mbili kwa mchezaji wetu hizo zinafanyiwa kazi. Makubaliano yakifika taarifa itatolewa kwa kuwa mchezaji bado yupo hivyo hakuna tatizo kuhusu wengine kusema hivi na vile, viongozi tupo na masuala ya kimkataba yanatatuliwa kwa mkataba," alisema Kamwe
Mzize amezivutia timu nyingi katika dirisha hili, uhamisho wake umekumbana na sintofahamu kila mara kutokana na mvutano unaojitokeza baina ya Wasimamizi wa mchezaji huyo na Yanga
Yanga imeridhia baadhi ya ofa lakini changamoto inajitokeza upande wa wasimamizi wa mchezaji ambao nao wana ofa zao
Kwa mchezaji mwenye mkataba wa zaidi ya miezi sita, timu inayomuhitaji inapaswa kuwasiliana na timu inayommiliki kwanza ili kupata ruhusa ya kuzungumza na mchezaji ambapo kama makubaliano yanafikiwa, mchakato wa uhamisho ndio huanza
Hakuna utaratibu wa wakala kuwasilisha ofa kwa niaba ya timu inayotaka kumnunua mchezaji mwenye mkataba wa zaidi ya miezi sita
