Baada ya tetesi za Yanga kumalizana na mkufunzi wa timu ya Taifa ya Madagascar Romuald Rakotondrabe 'Roro' na sasa ikielezwa kuna mazingira yameweka ugumu kwa Yanga kumpata Roro kwa wakati huu, Mkufunzi wa Yanga Romain Folz anaendelea na majukumu yake kama kawaida
Folz amekadhiwa jukumu la kuivusha Yanga hatua ya makundi ya michuano ya ligi ya mabingwa akikabiliwa na dakika 180 mbele ya Silver Strikers ya Malawi
Mchezo wa mkondo wa kwanza utapigwa Oktoba 18 na marudiano kupigwa Oktoba 25 jijini Dar es salaam
Ni takribani siku tano tu zimesalia kuelekea mchezo huo, ni wazi haitawezekana Yanga kufanya mabadiliko ya benchi la ufundi sasa
Unaweza kusema Folz amepewa nafasi nyingine ya kuwashawishi mashabiki ambao kimsingi ndio wanaopeleka presha kwa uongozi afutwe kazi
Dakika 180 za mchezo dhidi ya Silver Strikers zinaweza kubadili upepo na kocha huyo kuendele kusalia Jangwani
Lakini kama mambo yatakwenda tofauti hata katika mechi ya mkondo wa kwanza itakayopigwa Jumamosi huko Malawi, uongozi unaweza kulazimika kuchukua uamuzi mgumu na pengine kuteua kocha wa muda wakati wakiendelea kusubiri hatma ya Roro
