Yanga inaingia kambini leo kwa ajili ya maandalizi ya mchezo wa mkondo wa pili kuwania tiketi ya kutinga hatua ya makundi ligi ya mabingwa barani Afrika (CAFCL) dhidi ya Silver Strikers utakaopigwa Jumamosi Oktoba 25 katika uwanja wa Benjamin Mkapa.
Kocha Msaidizi Patrick Mabedi anakaimu nafasi ya Kocha Mkuu wakati uongozi ukiendelea na mchakato wa kumsaka mrithi wa Romain Folz aliyeonyeshwa mlango wa kutokea baada ya kipigo cha ugenini dhidi ya Silver Strikers.
Inaelezwa uongozi wa Yanga umemkabidhi Mabedi jukumu la kuiandaa timu na kuivusha hatua ya makundi huu ukiwa mtihani wake wa kwanza tangu alipojiunga na mabingwa hao wa nchi wiki iliyopita.
Mabedi anashirikiana na makocha wengine waliobaki katika benchi la ufundi baada ya Folz na Manu Rodriguez kuondoka.
Kocha huyo wa zamani wa timu ya Taifa ya Malawi kama atabadili upepo na kurejesha ile Gusa Achia Twenda kwao ya Wananchi na kuipeleka Yanga hatua ya makundi (CAFCL) anaweza kukabidhiwa majukumu ya kuinoa Yanga moja kwa moja
