Ijumaa Novemba 28 2025 Yanga itakuwa dimbani huko Algeria kuikabili JS Kabylie katika mchezo wa pili wa hatua ya makundi ligi ya mabingwa barani Afrika (CAFCL).
Ni mchezo mwingine kutoka kundi B baada ya kukamilika mechi za raundi ya kwanza Yanga ikipata ushindi wa bao 1-0 dhidi ya AS FAR huku Kabylie wakichapwa mabao 4-1 na Al Ahly.
Wenyeji wa mchezo huo JS Kabylie wametangaza kuuza tiketi zote siku mbili kabla ya mchezo ambao utapigwa kwenye uwanja unaochukua takribani mashabiki 50,766.
Hii inaonyesha ni kwa kiasi gani mashabiki wa timu hiyo wana shauku kubwa kuishuhudia timu yao katika uwanja wa nyumbani baada ya kufungwa mchezo uliopita.
Ni wazi hautakuwa mchezo mwepesi lakini Yanga haiwezi kutishwa na mazingira hayo kwani tayari imepata uzoefu wa kucheza katika mechi zenye presha kubwa.
Misimu miwili iliyopita hapo Algeria, Yanga ilicheza fainali ya kombe la Shirikisho (CAFCC) dhidi ya USM Algeria na kuibuka na ushindi wa bao 1-0 katika mazingira magumu.
Kikosi cha Yanga kilitua Algeria jana wakiendelea na program za mazoezi kuelekea mchezo huo.
Aidha Yanga imewahi nchini humo ili kuzoea hali ya hewa ambapo kwa sasa ni kipindi cha baridi inayofikia hadi nyuzi joto 10.
Vijana wa kocha Pedro Goncalves leo watafanya mazoezi katika viwanja vya hoteli Le Relais Vert na kesho kukamilisha maandalizi katika uwanja wa Hocine Aït Ahmed ambao mchezo huo utapigwa siku ya Ijumaa.
