Timu ya Taifa ya Tanzania 'Taifa Stars' leo Jumamosi, inatupa karata ya pili kwenye michuano ya Afcon 2025 pale itakapowakabili majirani zao Uganda katika mchezo mwingine wa kundi C.
Tanzania bado inasaka ushindi wa kwanza katika michuano hiyo na kuandika historia kwani hii ikiwa mara ya nne kufuzu kwa michuano ya Afcon, haijawahi kushinda.
Pengine ni nafasi sasa kwa Stars kuandikisha ushindi wake wa kwanza lakini haitakuwa rahisi mbele ya majirani zao Uganda.
Akizungumza mapema leo kuelekea mchezo huo, Kocha wa timu ya taifa ya Tanzania (Taifa Stars), Miguel Gamondi, amesisitiza kuwa na imani kubwa na kikosi chake kuelekea mechi dhidi ya Uganda hapo kesho.
Gamondi amesema Taifa Stars imejiandaa vizuri na haina hofu dhidi ya The Cranes, akiamini uwezo, nidhamu na morali ya wachezaji wake vinaweza kuleta matokeo chanya katika mechi hiyo itakayopigwa kwenye uwanja wa Al Medina.
Gamondi amesema heshima inatolewa kwa wapinzani wote, lakini Tanzania itaingia uwanjani kupambana kwa lengo la kushinda na kujiweka katika nafasi nzuri ya kusonga mbele.
“Uganda sio timu kubwa, wao na sisi ni kama sawa tu, angalia hata utofauti wa uwiano wa wachezaji wanaocheza ndani na nje, kisha utaona."
"Ni dabi na itakuwa mechi ngumu, lakini ubora na utendaji uwanjani utaamua mchezo. Kwa upande wetu tuna wachezaji wanaoweza kushinda huu mchezo tuna kina Msuva, Samatta; na hilo ni jambo ambalo watanzania wanapaswa kulifahamu,” alisema Gamondi.
Tanzania na Uganda zitakutana huku zikiwa zimetoka kupoteza mechi zao za kwanza kundi C. Tanzania ilifungwa mabao 2-1 na Nigeria wakati Uganda wakichapwa mabao 3-1 na Tunisia.
