Alhamisi ya wiki, January 1 2026 dirisha dogo la usajili linatarajiwa kufunguliwa ambapo timu za ligi kuu, Championship, daraja la kwanza na ligi ya Wanawake zitakuwa na nafasi ya kuboresha vikosi.
Mapema tu, uongozi wa Yanga umeweka wazi, watalitumia dirisha hilo ipasavyo kufanya maboresho muhimu.
Meneja wa Habari na Mawasiliano wa Yanga Ali Kamwe amesema tayari baadhi ya sajili zimekamilika kinachosubiriwa ni kuanza kwa utambulisho.
Kamwe amedokeza kuwa zoezi hilo litaanza mara moja pale dirisha litakapofunguliwa.
Msemaji huyo wa mabingwa wa nchi amesema nyota wapya wanapaswa kuanza mazoezi na timu mara moja.
Inaelezwa mshambuliji Emmanuel Mwanengo kutoka klabu ya TRA United ni miongoni mwa sajili mpya zinazoingia dirisha dogo na huenda akaitumikia Yanga katika michuano ya kombe la Mapinduzi iliyoanza kutimua vumbi jana.
