Yanga Princess yashuka nafasi ya tatu baada ya kupoteza dhidi ya Simba Queens

Baada ya kukubali kipigo cha mabao 2-0 kutoka kwa Simba Queens hapo jana katika mchezo wa ligi kuu ya Wanawake (WPL), Yanga Princess imeshuka hadi nafasi ya tatu katika msimamo wa ligi.

Princess inayonolewa na kocha Edna Lema akisaidiwa na Said Maulid 'SMG' imecheza mechi tano, imeshinda nne na kupoteza mechi ya kwanza hapo jana.

Lema pengine anahitaji kukiboresha kikosi chake hasa katika safu ya ushambuliaji ili kwendana na ushindani dhidi ya wapinzani wake wakuu Simba Queens na JKT Queens.

Dirisha dogo la usajili litafunguliwa siku ya Alhamisi, Yanga Princess ikiwa tayari imekamilisha usajili wa winga Aisha Djaffar. Maboresho zaidi yanatarajiwa katika dirisha hilo.