Inaelezwa tayari Yanga imemalizana na mshambuliaji Andy Boyeli wakisitisha mkataba wake wa mkopo kutoka klabu ya Sekhukhune United ya Afrika Kusini.
Boyeli anarejea kwa waajiri wake hao baada ya kushindwa kutamba ndani ya kikosi cha Yanga.
Anaondoka Yanga akiwa amefunga mabao mawili katika ligi kuu ya NBC, mabao pekee aliyofunga katika mechi za mashindano.
Ni wazi haikuwa rahisi kwake kuvaa viatu vilivyowahi kuvaliwa na Mcongomani mwenzake Fiston Mayele aliyeacha alama Yanga kabla ya kutimkia Pyramids.
Mashabiki wa Yanga waliweka matarajio makubwa kwake lakini ni kama hakuweza kwendana na aina ya uchezaji wa Yanga.
Yanga tayari imeongeza mshambuliaji wa ndani Emmanuel Mwanengo katika dirisha hili dogo huku ikitarajiwa kushusha mshambuliaji mwingine wa kigeni kuchukua nafasi ya Boyeli.
