Kocha Mkuu wa Yanga Pedro Goncalves alitamani nyota mpya Buba Jammeh raia wa Gambia aliyesajiliwa muda mchache kabla ya dirisha dogo la usajili kufungwa, ajiunge na timu nchini Morocco.
Hata hivyo mpango huo umekwama baada ya mchezaji huyo kukumbana na changamoto ya hati yake ya kusafiria nchini Gambia na hivyo kushindwa kusafiri Morocco.
Meneja wa Habari na Mawasiliano wa Yanga Ali Kamwe ametoa ufafanuzi kwa nini nyota huyo hakutua Morocco kama ilivyotaarifiwa awali ambapo pengine angekuwa sehemu ya kikosi kitakachoikabili AS FAR katika mchezo muhimu wa raundi ya tano CAFCL.
"Buba kwa mpango wa kwanza ilikuwa aje moja kwa moja hapa Morocco na kila kitu kilikuwa tayari kiko sawa na alitarajiwa kuwasili leo (jana) ili ashiriki mazoezi na timu."
"Wakati tunamsajili alikuwa Angola na alikuwa akishughulikia hati yake ya kusafiria hivyo ikabidi atoke Angola aende Gambia kukamilisha zoezi hilo."
"Mpaka jana alikuwa amekamilisha zoezi hilo kwa sehemu kubwa zilikuwa zimesalia document chache tu za kukamilisha. Tukaangalia utaratibu wake kusafiri mpaka hapa Morocco, tukabaini angetua siku ya Jumamosi asubuhi."
"Kocha alimuhitaji atue mapema ili aweze kufanya mazoezi na timu ili kujiridhisha kama anaweza kumtumia katika mchezo dhidi ya AS DAR lakini imeshindikana kutokana na changamoto ya hivyo vibali vyake."
"Hivyo uongozi umeamua Buba atasafiri moja kwa moja jijini Dar es salaam ambapo ataungana na timu baada ya mchezo wetu dhidi ya AS FAR," alisema Kamwe
