Ushindi wa bao 1-0 dhidi ya Namungo Fc katika mchezo wa ligi kuu ya NBC hapo jana ulikuwa na maana kubwa kwa Wananchi.
Ukiacha thamani ya alama hizo tatu walizopata ugenini, ushindi huo unawaweka karibu na rekodi nyingine ya kutopoteza mchezo kwa muda mrefu kwenye ligi kuu.
Ni hivi; mara ya mwisho kwa Yanga kupoteza mchezo kwenye ligi kuu ya NBC ni Novemba 07 2024 ikichapwa mabao 3-1 na Tabora United katika mchezo uliopigwa uwanja wa Azam Complex.
Tangu wakati huo, Yanga haijapoteza tena mechi ya ligi kuu kwa takribani miezi 15 wakicheza mechi 29.
Kama Wananchi hawatapoteza mchezo unaofuata dhidi ya JKT Tanzania basi watafikisha mechi 30 bila ya kupoteza mchezo ambapo ni sawa na kucheza msimu mzima.
Msimu huu Yanga tayari imecheza mechi 9, ikishinda nane na kutoka sare mchezo mmoja. Ni msimu mwingine kwa Wananchi kuweka rekodi ya kibabe.
