Kikosi cha Yanga leo kinaanza maandalizi ya mchezo wa ligi kuu dhidi ya Tanzania Prisons ambao utapigwa Jumamosi, April 04 dimba la KMC Complex.
Baada ya kucheza mechi mfululizo, Uongozi wa Yanga ulitoa mapumziko ya takribani wiki moja kwa wachezaji wote ambao hawakuwa na majukumu ya timu za Taifa.
Leo wanarejea wakiwa na ari mpya kuelekea mechi za kukamilisha duru ya pili ya ligi.
Aidha Kocha Msaidizi mpya Abdulhamid Moalin leo anatarajiwa kuanza rasmi majukumu yake akishirikiana na benchi la ufundi linaloongozwa na kocha Pedro Goncalves.
Mwezi April Yanga itapata ahueni kidogo kwenye ratiba wakitarajiwa kucheza mechi tano, nne zikiwa za ligi kuu na moja ya kombe la CRDB.
Lakini pia Wananchi watashiriki kombe la Muungano linalotarajiwa kuanza April 22 hadi 26 Yanga wakiwa mabingwa watetezi wa michuano hiyo.
