Beki wa Yanga SC, Ibrahim Bacca, amerejea rasmi kwenye mazoezi ya klabu jana, akiungana na wachezaji wengine waliojifua kwenye KMC Complex, wakijiandaa na mchezo wa ligi kuu dhidi ya Tanzania Prisons utakaochezwa Jumamosi, Aprili 4, 2026, kwenye uwanja huo huo.
Bacca, ambaye ni tegemeo kwa Yanga na timu ya Taifa, amesema anajisikia faraja kurejea kikosini. Aidha, amewaombea wachezaji wenzake beki Dickson Job na mshambuliaji Clement Mzize ambao wataendelea kukosa michezo kwa muda mrefu kutokana na majeraha.
Job alipata maumivu katika mchezo wa Ligi Kuu dhidi ya Simba SC, uliochezwa kwenye Uwanja wa New Amaan Complex, na taarifa za awali zinasema huenda akarejea uwanjani kwenye pre-season ya maandalizi kuelekea msimu ujao.
Mshambuliaji Clement Mzize nae msimu huu amekumbwa na majeraha ya kila mara ambayo yamepelekea kufanyiwa upasuaji wa goti mara mbili akitarajiwa kukosekana mpaka mwisho wa msimu
Akizungumza na waandishi kwenye Yanga Media Day, Bacca alisema:
“Mimi kwa upande wangu namshukuru Mungu nimerejea uwanjani ila namiss uwepo wa mwenzetu Job (Dickson), tunamuombea kwa Mwenyezi Mungu apone haraka hata kwa msimu huu aweze kurejea kwa kuwa kwa Mwenyezi Mungu hakuna kinachoshindikana."
"Sisi tunapambana kwa ajili yake na hata Clement Mzize pia tunamoombea apone haraka kwa kuwa tunaendelea kupambana kuona timu inapata matokeo mazuri uwanjani,” alisema Bacca
Bacca, Chadrack Boka, Edmund John na Prince Dube wameimarika na tayari kurejea kikosini huku Laurindo Aurelio 'Depu' akiendelea kuwa chini ya ungalizi wa daktari.
Mwezi huu March Yanga ilikabiliwa na mfululizo wa mechi hali iliyopelekea majeruhi wengi lakini kipindi cha mapumziko ya kalenda ya FIFA kimewasaidia baadhi ya wachezaji kurejea kikosini kwa wakati.
