Klabu ya Yanga imeanza mapema mipango ya kuimarisha kikosi chake kuelekea msimu ujao, ikiwa ni pamoja na kusaka kiungo mkabaji mpya atakayeimarisha eneo la kiungo wa ulinzi.
Kwa mujibu wa taarifa za ndani, uongozi wa Yanga umeanza mchakato wa ufuatiliaji wa wachezaji kadhaa wa kimataifa, huku jina la kiungo wa Klabu ya Zoman FC, Mamadou Thierno, likitajwa kuwa miongoni mwa wanaofuatiliwa kwa karibu zaidi.
Kwa sasa, eneo la kiungo mkabaji ndani ya Yanga linategemewa zaidi na wachezaji kama Mohamed Damaro pamoja na Duke Abuya, ambao wamekuwa wakipishana katika nafasi hiyo kutokana na mahitaji ya kikosi.
Kumekuwa na maoni tofauti kuhusu aina ya uchezaji wa Damaro ambaye imekuwa nadra kwake kumaliza dakika 90 bila kupewa jambo ambalo wachambuzi wa soka wanaona hawezi kuwa mchezaji wa kutegemewa katika nafasi hiyo.
Damaro alitua Yanga kwa mkopo kwenye usajili wa dirisha dogo Januari 2026 akitokea klabu ya Singida BS. Habari njema ni kuwa Damaro ni mchezaji wa ndani hivyo Yanga inasaka mchezaji wa kigeni ambaye atachukua nafasi ya Moussa Balla Conte aliyetolewa kwa mkopo klabu ya Raja CA.
Thierno aonekana kuwa chaguo sahihi
Mamadou Thierno anacheza kama kiungo namba 6 (defensive midfielder), nafasi ambayo inahitaji nguvu, akili ya mchezo na uwezo wa kusoma hatari mapema.
Mafanikio yake hadi sasa yanaonesha ubora wake kama mchezaji wa kiwango cha juu:
- Msimu uliopita alitwaa tuzo ya kiungo bora wa ulinzi
- Msimu huu ametajwa kwenye kikosi bora cha wiki mara 7 kwenye ligi ya Ivory Coast
- Msimu huu tayari amefunga mabao 2 na kutoa asisti 2
Takwimu hizo zimeifanya Yanga kuona uwezekano wa kupata kiungo atakayesaidia kuongeza ubora na kina katika kikosi chao, hasa katika mashindano ya ndani na kimataifa.
Mkakati wa mapema sokoni
Vyanzo vya karibu na klabu vinaeleza kuwa Yanga imeamua kufanya kazi mapema sokoni ili kuepuka ushindani mkali wa usajili unaojitokeza mwishoni mwa msimu. Lengo kuu ni kuhakikisha kikosi kinaendelea kuwa imara na chenye ushindani katika kila idara.
Iwapo mazungumzo yatafanikiwa, Mamadou Thierno anaweza kuwa miongoni mwa nyota wapya wa kuimarisha kikosi cha Yanga kuelekea msimu ujao.
Pamoja nae, Yanga pia inaelezwa ilifanya mazungumzo na kiungo wa Azam Fc James Akamiko ambaye mkataba wake na Azam Fc unamalizika mwshoni mwa msimu. Hata hivyo inaelezwa kiungo huyo bado hajafanya maamuzi juu ya hatma yake.
