Katika mechi nne mfululizo kiungo mshambuliaji wa Yanga Allan Okello amefunga mabao mawili kila mechi mashabiki wakitamani kuona mchezaji huyo wa Kimataifa wa Uganda anapewa muda zaidi wa kucheza ili afunge hat-trik ya kwanza msimu huu.
Hata hivyo imekuwa tofauti, mara nyingi benchi la ufundi la Yanga humtumia Okello kwa tahadhari, kwani ni nadra kwake kumaliza dakika 90. Kocha Abdihamid Moalin amefichua mpango wa kumlinda star huyo ili kumuepusha na majeraha
Moallin amesema wanatambua kiu ya mashabiki lakini kwa sasa kuna haja ya kuangalia mafanikio ya jumla ya timu na sio rekodi binafsi katika mechi zilizosalia.
“Nikweli najua mashabiki wanatamani hilo, lakini kwa sasa timu yetu lazima tuwe makini, tumemkosa Pacome (Zouzoua) baada ya kuumia kwenye mchezo dhidi ya Singida, wote tunafahamu umuhimu wa kuwa na Pacome kwenye timu yetu,” amesema Moallin.
“Hatuwezi kufanya kosa lingine kwa kuruhusu kuumia kwa Okello wakati ambao ameshatekeleza vizuri lengo kuu la timu kushinda, tulichotakiwa ni kuulinda ushindi wetu, tuna sababu ya kuangalia mbele zaidi.
“Hatuzuii wachezaji kuweka rekodi binafsi, ikitokea wamefanya hivyo wote tutafurahia lakini kitu muhimu hapa kwetu kwasasa ni kuangalia mafanikio ya timu kwa ujumla ambayo ni kushinda ubingwa msimu huu,” alisema Moallin
Kuhusu Pacome, Moallin amewahakikisha mashabiki wa Yanga kuwa atarejea kwa wakati na pengine watamuona uwanjani kwenye mchezo utakaofuata (dhidi ya Mashujaa Fc) baada ya mapumziko ya kalenda ya FIFA
“Pacome atarejea kwa wakati, alishaanza matibabu ya eneo ambalo ameumia, tunatarajia atakuwa tayari kabla ya kwenda kucheza mchezo unaofuata ugenini, pia nadhani kuna wengine nao watakuwa wamekaa sawa"
