Msimu huu wa Ligi Kuu Tanzania Bara umekuwa wa ushindani mkali. Yanga ikichuana vikali na watani zao Simba kuwania taji la ligi kuu.
Wananchi wako kileleni wakiwa na alama 60 huku Simba ikiwa nafasi ya pili ikiwa na alama 55 huku kila timu ikisalia na mechi tano.
Kwa Yanga, ubingwa unaweza kuwa na uzito mkubwa zaidi kuliko misimu ya nyuma, kutokana na mazingira hayo ya ushindani.
Msimu uliopita bado unabaki kuwa moja ya misimu bora zaidi katika historia ya klabu hiyo. Yanga ilitwaa ubingwa ikiwa na rekodi ya alama 82 pamoja na kufunga mabao 83, takwimu ambazo zimeweka kiwango cha ubora katika ligi.
Licha ya malengo ya kutetea taji, Yanga haitoweza kufikia au kuvunja takwimu za msimu uliopita. Katika mechi tano zilizobaki, hata kama watafanikiwa kushinda zote, watafikisha alama 75, ambayo ni pungufu ya kile walichokipata msimu uliopita.
Vivyo hivyo, kwenye upande wa mabao, timu hiyo kwa sasa ina mabao 58, ikiwa nyuma kwa zaidi ya mabao 25 ukilinganisha na msimu uliopita.
Licha ya kushuka kwa takwimu, malengo makuu ya msimu huu kwa Wananchi ni wazi: kutetea taji la ligi kwa mara ya tano mfululizo. Hili ni jambo ambalo bado lina uzito mkubwa na linaweza kuingia katika historia ya mafanikio ya klabu.
Haitakuwa mara ya kwanza kwa Yanga kufikia mafanikio ya kutwaa mataji mfululizo kwa misimu mingi, lakini kufanya hivyo katika mazingira ya sasa ya ushindani mkali kunalifanya jambo hilo kuwa na thamani zaidi.
Uwepo wa ushindani mkali kutoka kwa wapinzani wao wa jadi Simba, umeufanya msimu huu kuwa mgumu zaidi. Hali hiyo inamaanisha kuwa endapo Yanga watafanikiwa kutetea taji, ubingwa huo utakuwa wa heshima kubwa zaidi.
