Mashabiki wa Yanga wanaweza kutabasamu baada ya mshambuliaji wao Clement Mzize, kuonyesha maendeleo makubwa katika safari yake ya kupona majeraha yaliyomuweka nje kwa sehemu kubwa ya msimu huu.
Mzize tayari ameanza programu za mazoezi ya Gym ikiwa ni sehemu ya hatua za mwisho za kurejea kwake uwanjani. Hata hivyo, uongozi wa Yanga hauna mpango wa kuharakisha kurejea kwake kwenye ushindani wa mechi rasmi, ukitaka kumpa muda wa kutosha kujiimarisha kimwili na kuhakikisha anarejea akiwa katika kiwango bora kabisa bila hatari ya kupata majeraha mengine.
Safari ya majeraha ya mshambuliaji huyo ilianza wakati wa michuano ya CHAN iliyofanyika mwezi Agosti 2025 katika nchi za Kenya, Uganda na Tanzania. Akiwa na kikosi cha Taifa Stars, Mzize alipata tatizo la goti ambalo lilimfanya kukosa mechi kadhaa za mwanzo wa msimu wa Yanga.
Baada ya matibabu na programu za uangalizi, alifanikiwa kurejea uwanjani, lakini bahati mbaya majeraha hayo yalitoneshwa tena na kumlazimu kukaa nje kwa kipindi kingine. Licha ya changamoto hiyo, jitihada za kumpa matibabu ziliendelea na mshambuliaji huyo akarejea kwa mara nyingine, akicheza kwa dakika chache katika mchezo wa Ligi ya Mabingwa Afrika dhidi ya FAR Rabat nchini Morocco.
Hata hivyo, baada ya mchezo huo hali yake haikuwa nzuri tena na majeraha yakajirudia. Kutokana na hali hiyo, Yanga iliamua kuchukua hatua ya ziada kwa kumpeleka Afrika Kusini kwa matibabu maalum ambapo alifanyiwa upasuaji mwingine wa goti ili kutatua tatizo hilo kwa kiwango cha kudumu.
Kwa sasa maendeleo ya Mzize ni vizuri na amebakiza hatua chache kabla ya kurejea kwenye mazoezi ya kawaida ya mpira. Hata hivyo, viongozi wa Yanga wanaamini hakuna sababu ya kuhatarisha afya yake kwa kumrudisha haraka, hasa ikizingatiwa historia ya majeraha aliyopitia katika kipindi cha mwaka mmoja uliopita.
Kwa mujibu wa ratiba ya urejeaji wake, mashabiki wa Yanga wanatarajiwa kumuona tena Mzize uwanjani wakati wa maandalizi ya msimu mpya (pre-season), ambapo atapata nafasi ya kurejesha makali yake taratibu kabla ya kuanza kutumika kikamilifu katika mashindano ya msimu ujao.
