Meneja wa Habari na Mawasiliano wa Yanga, Ally Kamwe mara baada ya kuwasili Zanzibar, amesema kikosi hicho kimewasili Zanzibar kikiwa na lengo moja tu la kuhakikisha kinatwaa taji la NBC Premier League na kufuta maumivu ya kupoteza mbele ya Azam FC kwenye nusu fainali ya Kombe la Shirikisho la CRDB Bank.
Akizungumza baada ya kuwasili visiwani humo jana, Kamwe alisema Azam FC wamebaki na simulizi pekee baada ya ushindi wao wa hivi karibuni, huku akisisitiza kuwa Yanga ipo tayari kumalizia kazi kwenye mchezo ujao.
"Tumeshakula ng'ombe mzima, mkia tu ni kidogo sana na tumejipanga kumalizia sehemu iliyobaki," alisema Kamwe akimaanisha kuwa hatua iliyobaki kuelekea ubingwa si kubwa ukilinganisha na kazi ambayo tayari wameifanya msimu mzima.
Yanga inakabiliwa na mtihani mgumu mbele ya Azam FC ambao tayari wameonyesha uwezo wao wa kuwazuia Wananchi baada ya ushindi wa mabao 3-2 katika nusu fainali ya Kombe la Shirikisho.
Swali kubwa kwa sasa ni je, Azam FC wataweza kuibuka washindi kwa mara ya pili mfululizo dhidi ya Yanga katika Uwanja wa New Amaan Complex, au Wananchi watatumia mchezo huo kuthibitisha ubora wao na kujiweka katika nafasi nzuri ya kutetea ubingwa kwa msimu wa tano mfululizo?
Mchezo huo unatarajiwa kupigwa saa 10 jioni muda ambao mechi zote za mzunguuko wa 28 zitapigwa.
