Wakati DR Congo ikiweka rekodi ya kutinga hatua ya 32 bora michuano ya kombe la Dunia inayoendelea huko Mexico, Canada na Marekani, mshambuliaji wa zamani wa Yanga Fiston Mayele ameandika rekodi yake.
Katika mechi dhidi ya Uzbekistan ambayo DR Congo walihitaji ushindi ili kukata tiketi ya hatua ya 32 bora, ukawa mchezo wa kwanza kwa Mayele katika michuano hiyo akiingia kwenye dakika ya 50.
Dakika chache tu baada ya kuingia ubao ukisoma 1-1, Mayele akaweka kambani bao la pili na kuliweka Taifa lake mbele kabla ya Yoane Wissa kufunga bao la tatu dakika za lala salama na kuihakikishia DR Congo ushindi huo muhimu.
Kwa Mayele ilikuwa siku ya kihistoria kwake akitimiza ndoto lakini pia akilisaidia Taifa lake kupata ushindi muhimu.
Mayele hakusita kutumia ile shangillia yake maarufu ya kutetema baada ya kupachika bao lake.
Ni heshima kwa Taifa lake lakini pia Yanga inajivunia kwani unaweza kusema mwanzo wa hadithi yake ilianzia hapa Jangwani.
Rais wa Yanga Injinia Hersi Said alisafiri DR Congo na kumleta Tanzania wakati akiwa hana jina.
Yanga ilimpa nafasi akatengeneza jina lake na kuwashawishi matajiri wa Pyramids kumsajili.
