Jana kulikuwa na zoezi la kufanyiwa vipimo vya afya kwa wachezaji wa Yanga kabla ya kuingia rasmi kambini kuanza maandalizi ya msimu mpya wa mashindano 2026/27.
Kilichowafurahisha Wananchi ni kuwashuhudia baadhi ya nyota ambao kulikuwa na hatihati huenda wasiwe sehemu ya kikosi cha mabingwa hao wa nchi msimu ujao.
Kiungo mkongwe, mwandamizi Salum Abubakar 'Sure Boy' ni miongoni mwa wachezaji ambao walishiriki zoezi hilo.
Imeelezwa kuwa Sure Boy maarufu 'Babu Kaju' ameongeza mkataba wa mwaka mmoja kuendelea kuwatumikia mabingwa hao wa soka Tanzania Bara.
Yanga imeamua kumbakisha Sure Boy kutokana na uzoefu wake lakini pia ni mchezaji muhimu linapokuja suala la uhamasishaji kwenye vyumba vya kubadilishia nguo.
Katika zoezi hilo pia alionekana mlinda lango Hussein Masalanga ambaye mkataba wake wa mkopo kutoka klabu ya Singida BS ulimalizika mwishoni mwa msimu uliopita.
Yanga imemsajili Masalanga moja kwa moja akiwa mchezaji huru baada ya mkataba wake na Singida BS kufika tamati. Masalanga nae amesaini mkataba wa mwaka mmoja.
Lakini pia winga Denis Nkane ambaye msimu uliopita aliitumikia TRA United kwa mkopo, amerejea kikosini.
Kutokana na ugumu wa ratiba msimu huu Yanga inatarajiwa kuwa na kikosi chenye wachezaji kati ya 35 na 40.
Hivi karibuni Rais wa TFF Wallace Karia alizishauri klabu kusajili wachezaji wengi ili kwendana na mikiki mikiki ya ratiba ngumu ya mechi msimu ujao.
Ligi Kuu ya NBC inapaswa kumalizika mwezi May ili kupisha maandalizi ya michuano ya Afcon 2027 itakayoanza katikati ya mwezi Juni 2027.
