Kiungo mkabaji wa timu ya Taifa ya Tanzania, Alphonce Mabula amerejea nchini akitajwa kuwa mbioni kujiunga na mabingwa wa soka Tanzania Bara, Yanga.
Mabula amehusishwa sana na Yanga kwenye dirisha hili la usajili taarifa zikibainisha kuwa makubaliano ya kutua kwa Wananchi yalishafikiwa suala lililokuwa limebaki ni kusaini mkataba tu
Kiungo huyo wa kimataifa wa Tanzania ana uzoefu mkubwa wa soka la nje baada ya kutumia takribani misimu minne akicheza Ulaya. Kabla ya kujiunga na Shamakhi ya Azerbaijan Januari 2025, Mabula alikuwa sehemu ya kikosi cha Spartak Subotica ya Serbia aliyojiunga nayo Februari 2022 akitokea Alliance FC.
Mbali na Spartak Subotica, Mabula pia aliwahi kucheza RFK Novi Sad kwa mkopo katika msimu wa 2024/25, akipata uzoefu zaidi katika mazingira ya soka la ushindani barani Ulaya.
Uwezo wa Mabula kucheza nafasi mbalimbali za kiungo ni moja ya vitu vilivyoivutia Yanga. Mbali na kuwa na uwezo wa kucheza kama kiungo mkabaji, nyota huyo pia anaweza kusaidia katika ujenzi wa mashambulizi kutokana na uelewa wake wa mchezo.
Ingawa ni mchezaji wa ndani, uzoefu wake wa kucheza mashindano ya kimataifa na soka la ushindani nje ya Tanzania umetajwa kuwa sababu kubwa iliyowafanya viongozi wa Yanga kuvutiwa na huduma yake.
Kuna sapraizi imeandaliwa kwa Wananchi siku ya Jumapili kwenye YANGA DAY, huenda jina la Mabula likatangazwa kutua kwa Wananchi siku hiyo.
