Gor Mahia kushiriki michuano ya Kagame ni faida kwa Yanga

Baada ya kujitoa kwenye michuano ya kombe la Kagame inayoanza nchini Juni 28, 2018, Yanga imeipa mtihani mkubwa Gor Mahia inayoshiriki michuano hiyo.

Moja ya sababu iliyopelekea Yanga kujitoa kwenye michuano hiyo ni ukaribu wa mchezo wa kombe la shirikisho dhidi ya mabingwa hao wa Kenya utakaopigwa Julai 18 jijini Nairobi, Kenya.

Kushiriki kwa Gor Mahia kwenye michuano hiyo kutaipa Yanga nafasi ya kuisoma kikamilifu na pengine ikaweza kutumia madhaifu yake kupata matokeo nchini Kenya.

Kama Gor Mahia itaweza kutinga mpaka hatua ya fainali ya michuano hiyo, basi itakuwa Dar hadi Julai 13 siku tano kabla ya mchezo dhidi ya Yanga huko Kenya.

Gor Mahia ilionyesha kandanda safi kwenye michuano ya SPortPesa Super Cup iliyomaliza karibuni nchini Kenya ambapo timu hiyo ilitwaa ubingwa kwa msimu wa pili mfulilizo.

Yanga imedhamiria kutinga robo fainali ya michuano ya kombe la shirikisho barani Afrika.

Kutimiza adhma hiyo, lazima ihakikishe inapata matokeo kwenye michezo miwili dhidi ya Gor Mahia na ule wa nyumbani dhidi ya USM Alger utakaopigwa August 19.

Mchezo wa mwisho utakuwa dhidi ya Rayon SPorts, August 28