Ni siku kubwa kwa wapenzi na mashabiki wa Yanga kwani mwanzo wa msimu wa mashindano 2026/27 unafunguliwa leo visiwani Zanzibar.
Ni mchezo wa Ngao ya Jamii utakaowakutanisha mabingwa wa msimu uliopita ligi kuu ya Tanzania Bara Yanga dhidi ya mabingwa wa kombe la CRDB klabu ya Simba.
Mchezo wa Kariakoo Derby utakaopigwa uwanja wa New Amaan Complex saa 2:30 usiku.
Baada ya mabadiliko ya benchi la ufundi, mchezo huo utakuwa kipimo cha kwanza kwa kocha Manqoba Mngqithi na benchi lake kuona kama atawapeleka Wananchi nchi ya ahadi?
Yanga imefanya uwekezaji mkubwa kwenye dirisha hili wakisajili wachezaji wenye 'profile' kubwa kama Peter Shalulile ambaye wamemsajili kutoka klabu ya Mamelodi Sundowns.
Ni usajili uliolenga kufanya makubwa zaidi msimu huu kwenye mashindano ya ndani na ligi ya mabingwa barani Afrika.
Hautakuwa mchezo mwepesi kwani wanakutana na Simba ambayo haina mabadiliko makubwa wakiwa na benchi lao la ufundi lile lile lililomaliza nalo msimu uliopita.
Hakuna shaka kuwa Simba wameimarika sana na haishangazi msimu uliopita waliweza kuwapa ushindani Yanga kwani katika mechi nne walizokutana, kila timu ilishinda mechi moja huku wakitoka sare mechi mbili.
Hata hivyo wakati huu wanakutana na Yanga iliyofanyiwa maboresho makubwa kwenye baadhi ya maeneo hasa safu ya ushambuliaji.
Yanga ndio mabingwa watetezi wa Ngao ya Jamii na leo watashuka dimba la New Amaan Compex wakiwa na dhamira moja tu, kutetea Ngao hiyo.
