Klabu ya Yanga na wapenzi wa soka nchini wataendelea kumkumbuka aliyekuwa Rais na Mjumbe wa Baraza la Wadhamini wa klabu hiyo, Francis Kifukwe, aliyefariki dunia nchini India.
Kifukwe, ambaye alikuwa mmoja wa viongozi wenye ushawishi mkubwa katika historia ya Yanga, anakumbukwa kama nguzo imara iliyosaidia kuivusha klabu hiyo katika vipindi vya mpito na changamoto kubwa za kifedha na kiuongozi.
Katika miaka ya 2000, Kifukwe alijitolea kwa hali na mali kuigharimia timu wakati klabu hiyo ilipokuwa ikipitia ukata mkubwa.
Aliongoza klabu hiyo kwa misingi ya umoja, akiamini katika nguvu ya mashabiki na wanachama. Misimamo yake thabiti na mapenzi yake ya dhati kwa Yanga yalimfanya kuwa kipenzi cha 'Wanayanga' wengi, huku akitajwa kama daraja muhimu la maelewano ndani ya klabu.
Mbali na uongozi wake thabiti, Kifukwe ataendelea kukumbukwa kwa jicho lake la kipekee katika kusaka vipaji. Alikuwa kinara katika kufanikisha usajili wa wachezaji waliokuja kuwa tegemeo kubwa la klabu na timu ya taifa.
Kifo chake kimeacha pengo kubwa si tu ndani ya klabu ya Yanga bali katika tasnia nzima ya soka nchini Tanzania.
Wananchi, Wanachama na Mashabiki watapata nafasi ya kutoa heshima zao za mwisho katika Viwanja vya Karimjee, siku ya Alhamisi kuanzia saa 6:00 mchana hadi saa 10:00 jioni.
