Kocha Mkuu wa Yanga, Manqoba Mngqithi, amesisitiza umuhimu wa kila mshambuliaji wa timu hiyo kuanza kufunga mapema msimu huu, akiwataka wachezaji wake kuwa na kujiamini zaidi wanapokuwa mbele ya lango.
Mshambuliaji Peter Shalulile tayari amefungua akaunti yake ya mabao katika Ligi Kuu ya NBC, tofauti na mwenzake, Cheikh Ibrahim Toure, ambaye bado anasubiri bao lake la kwanza katika mechi za mashindano.
Hata hivyo, Toure anaweza kupata nafasi zaidi katika michezo ijayo kutokana na mkakati wa Mngqithi wa kuwapa nafasi washambuliaji wake wote ili kuhakikisha kila mmoja anakuwa tayari na anabaki kuwa mshindani ndani ya kikosi.
Katika mchezo uliopita dhidi ya Coastal Union, Mngqithi alianza na Shalulile kabla ya kumuingiza Toure kipindi cha pili. Kocha huyo pia alimtumia Mohamed Hussein ‘Zimbwe Jr’ kama winga, akieleza kuwa moja ya sababu ilikuwa kumtengenezea nafasi Toure ili aweze kufunga.
Pamoja na mpango huo, Zimbwe Jr ndiye aliyefanikiwa kuandika jina lake kwenye ubao wa mabao baada ya mpira wake wa krosi kubadilika mwelekeo na kujaa nyavuni.
“Nahitaji washambuliaji wangu wajiamini mapema sana ndani ya msimu huu. Cheikh Toure bado hajafunga, hivyo kwa upande wangu ni muhimu kuona wote wanaanza kufunga kwa sababu itawaondolea uoga na itawafanya wafocus zaidi,” alisema Mngqithi.
Yanga kesho Jumapili itarejea uwanjani katika KMC Complex kuikabili JKT Tanzania, mchezo ambao unaweza kumfanya Mngqithi aanze na washambuliaji wake wawili, Shalulile na Toure, kama alivyofanya katika mchezo wa kwanza wa msimu dhidi ya Namungo FC.
Mbali na Shalulile na Toure, Yanga pia imeongeza nguvu kwenye safu yake ya ushambuliaji baada ya kukamilisha usajili wa Seleman Mwalimu kutoka Wydad AC.
Mwalimu sasa anasubiri nafasi yake ndani ya kikosi hicho baada ya Yanga kukamilisha usajili wake dakika za mwisho, wakati awali alikuwa mbioni kujiunga na Simba.
Kwa kuongezeka kwa chaguo katika safu ya ushambuliaji, Mngqithi anaonekana kutaka ushindani mkubwa ndani ya kikosi, huku kila mshambuliaji akitakiwa kutumia nafasi atakayopewa na kuthibitisha uwezo wake mbele ya lango.
